Kemi kënaqësinë e veçantë t’Ju informojmë se Banka e Shqipërisë ka shpallur të hapur konkursin “Çmimi i Guvernatorit për Diplomën më të Mirë 2026”.
Në këtë konkurs, Banka e Shqipërisë fton të gjithë studentët shqiptarë të diplomuar brenda dhe jashtë vendit gjatë periudhës tetor 2025 – tetor 2026, të konkurrojnë me temat e tyre të diplomës mbi çështje të lidhura me integrimin dhe zhvillimin ekonomik, ekonomiksin monetar e ndërkombëtar, stabilitetin e çmimeve dhe atë financiar, etj.
Si çdo vit, përzgjedhja e tre temave fituese do të bëhet nga një komision i posaçëm shkencor i ngritur pranë Bankës së Shqipërisë për këtë qëllim.
Në këtë kuadër, do ta vlerësonim shumë ndihmën tuaj për të informuar pedagogët dhe studentët duke mundësuar publikimin e njoftimit dhe posterit në rrjetet sociale të universitetit Tuaj.
Për informacione te mëtejshme lutemi të konsultoheni me faqen e web-it të Bankës së Shqipërisë në këtë link.
Ftesë për tema
Banka e Shqipërisë fton të gjithë të interesuarit të marrin pjesë në konkursin e hapur “Çmimi i Guvernatorit për Diplomën më të Mirë për vitin 2026”, i dedikuar për studentët shqiptarë të diplomuar gjatë periudhës tetor 2025 – tetor 2026, brenda dhe jashtë vendit, për punë shkencore në një nga çështjet e ekonomiksit monetar e ndërkombëtar, stabilitetit financiar, çështje të integrimit ekonomik të vendeve të Ballkanit në Evropë, politika monetare dhe politikat makroprudenciale të Bankës së Shqipërisë, politika fiskale dhe roli i tyre në ekonomi, sistemi bankar shqiptar, sjelljet e individëve dhe
firmave në Shqipëri, si dhe aspekte të ekonomisë në përgjithësi
Banka e Shqipërisë e ka vendosur dhe e jep këtë Çmim që prej vitit 2006, sipas ndarjes së mëposhtme:
- Çmimi i parë 250.000 lekë
- Çmimi i dytë 200.000 lekë
- Çmimi i tretë 150.000 lekë
Afati i fundit i dorëzimit të temave: 31 tetor 2026
